По однос на вчерашната објава во медиумите за случајот со насилство врз жената од Гостивар, која била нападната физички од поранешниот вереник, Националната мрежа против насилство врз жени и семејно насилство очекува ИТНО ПОСТАПУВАЊЕ во согласност со законите и ратификуваната Истанбулска Конвенција.
- Покрај веќе превземените чекори, односно поднесувањето на обвинение за извршено кривично дело тешка телесна повреда чл. 131 ст. 2 од Кривичниот Законик, потребно е да бидат превземени и други мерки. Поконкретно: Јавното Обвинителството од Гостивар покрај обвинителниот предлог да поднесе и предлог до Основниот Суд во Гостивар за изрекување на мерката притвор против сторителот на насилството, а судот да ја изрече;
- Меѓуопштинискиот центар за социјални работи – Гостивар да поднесе до судот барање за изрекување на привремени мерки за заштита од насилство врз жени и семејно насилство, односно забрана за заканување, малтретирање, вознемирување, доближување, комуницирање и понатамошно вршење на насилство врз жртвата;
- Меѓуопштинскиот центар за социјална работа да стапи во контакт со жртвата и да и понуди бесплатна правна помош и да обезбеди психосоцијална помош и поддршка на жртвата;
- Министерството за здравство да и обезбеди бесплатна здравствена заштита на жртвата за лекување на повредите како и понатамошно лекување на последиците на насилството;
Очекуваме дека Основниот суд во Гостивар кој е надлежен за водење на судски постапки за кривични дела поврзани со насилство врз жени, да постапи во најитен рок по сите поднесени барања во врска со овој случај.
Дополнително, очекуваме дека Основниот суд во Гостивар ја разбира сериозноста на ова дело и ќе обезбеди соодветна (највисока) казна за сторителот.
Согласно досегашните практики и искуства на Националната мрежа со жртви на насилство и семејно насилство доколку итно не се преземат дејствија за заштита, насилството може да продолжи во континуитет со поголеми последици за жртвата.
